(1)
ਸੁਭਾ ਸਵੇਰੇ ਜਲਦੀ ਉੱਠੋ ,
ਸੈਰ ਕਰਨ ਨੂੰ ਜਾਓ I
ਪੰਛੀ,ਫਸਲਾਂ,ਰੁੱਖ ਵੇਖਕੇ,
ਵਾਪਸ ਘਰ ਨੂੰ ਆਓ I
ਦਾਤਣ-ਕੁਰਲੀ ਕਰਨ ਤੋਂ ਪਿੱਛੋਂ,
ਨਿੱਤ ਦੀ ਨਿੱਤ ਨਹਾਓI
ਵਰਦੀ ਪਾਕੇ ਬੱਚਿਓ,
ਜਲਦੀ ਸਕੂਲ ਵਿੱਚ ਆਓ I       

(2)
ਕੰਮ ਜੋ ਮਿਲਦਾ ਕਰਕੇ ਲਿਆਉਣਾ,
ਇਹ ਨਿਯਮ ਬਣਾਓ I
ਪੈਨਸਿਲ ਹੈ ਨੀ,ਕਾਪੀ ਮੁੱਕ'ਗੀ,
ਨਾ ਕੋਈ ਬਹਾਨਾ ਲਾਓ I
ਯਾਦ ਕਰਨ ਨੂੰ ਦੱਸਿਆ ਜਿਹੜਾ, 
ਓਹ ਵੀ ਖੂਬ ਸੁਣਾਓ I
ਵੈਰੀ-ਗੁੱਡ ਲੈਕੇ,
ਚੰਗੇ ਬਾਲ ਬਣ ਜਾਓ I

(3)
ਉੱਚੀ-ਉੱਚੀ ਬੋਲ-ਬੋਲ ਕੇ, 
ਪੜ੍ਹ ਲਓ ਤੁਸੀਂ ਪਹਾੜੇ I
ਸ਼ੇਰ ਜਿਵੇਂ ਜੰਗਲ ਦਾ ਰਾਜਾ, 
ਜੰਗਲ ਵਿੱਚ ਦਹਾੜੇ I
ਮਿਹਨਤ ਕਰਕੇ ਕਰੋ ਤਰੱਕੀ,
ਨਹੀਂ ਕਿਸੇ ਤੋਂ ਮਾੜੇ I
ਆਪਣੇ ਬਸਤਿਆਂ ਨੂੰ ,
ਨਾ ਸਮਝੋ ਤੁਸੀਂ ਭਾਰੇ I

(4)
ਆਓ ਸਾਰੇ 'ਕੱਠੇ ਹੋਕੇ ,
ਬਾਲ ਸਭਾ ਹੁਣ ਲਾਈਏ I
ਕਵਿਤਾ,ਗੀਤ,ਕਹਾਣੀ ਹੋਵੇ, 
ਕੁੱਝ ਨਾ ਕੁੱਝ ਸੁਣਾਈਏ I
ਆਪਣੇ-ਆਪ ਸੁਣਾਕੇ ਜਾਓ, 
ਐਵੇਂ ਨਾ ਘਬਰਾਈਏ I
ਧਿਆਨ ਨਾਲ ਸੁਣੋ ਬੱਚਿਓ, 
ਹੁਣ ਰੌਲਾ ਨਾ ਪਾਈਏ I

(5)
ਮੇਜ਼,ਕੁਰਸੀਆਂ,ਪੱਥਰ,ਇੱਟਾਂ, 
ਇਹ ਨਿਰਜੀਵ ਨੇ ਚੀਜ਼ਾਂ I
ਆਸੇ-ਪਾਸੇ ਹੋਰ ਵੀ ਵੇਖੋ ,
ਬਟਨ ਜੋ ਲੱਗੇ ਕਮੀਜ਼ਾਂ I
ਇੱਕ ਇਹਨਾਂ ਦੀ ਸੂਚੀ ਬਣਾਓ, 
ਪੂਰੀਆਂ ਲਾਕੇ ਰੀਝਾਂ I
ਫੇਰ ਤੁਸੀਂ ਵੇਖੋਂਗੇ ,
ਚੰਗਾ ਬਣੂ ਨਤੀਜਾ I

  (6)     
ਗਿਆਨ-ਇੰਦਰੀਆਂ ਪੰਜ ਹੁੰਦੀਆਂ ਨੇ, 
ਚੀਜ਼ਾਂ ਵੇਖਣ ਅੱਖਾਂ I
ਨੱਕ ਸੁੰਘਦਾ,ਕੰਨ ਆਵਾਜ਼ਾਂ ਸੁਣਦੇ, 
ਤਰ੍ਹਾਂ-ਤਰ੍ਹਾਂ ਦੀਆਂ ਲੱਖਾਂ I
ਚਮੜੀ ਗਰਮ-ਠੰਡੇ ਨੂੰ ਪਰਖੇ, 
ਜੀਭ ਨਾਲ ਮੈਂ ਚੱਖਾਂ I
ਗਿਆਨ-ਇੰਦਰੀਆਂ ਨੂੰ, 
ਸਾਫ਼-ਸੁਥਰੀਆਂ ਰੱਖਾਂ I

(7)
ਵੱਡਿਆਂ ਤੋਂ ਨਾ ਕੰਮ ਕਰਵਾਉਣਾ, 
ਛੋਟਿਆਂ ਦਾ ਨਾ ਕਰਨਾ I
ਗਣਿਤ,ਹਿੰਦੀ,ਅੰਗਰੇਜ਼ੀ ਕੁਝ ਵੀ, 
ਨਾ ਇਹਨਾਂ ਤੋਂ ਡਰਨਾ I
ਆਪਣਾ ਕੰਮ ਆਪੇ ਹੀ ਕਰਨਾ,
ਨਹੀਂ ਏਸ ਤੋਂ ਸਰਨਾ I
ਸੁੰਦਰ-ਲਿਖਾਈ ਕਰਕੇ, 
ਪੂਰਾ ਪੇਜ਼ ਹੈ ਭਰਨਾ I

(8)
ਸਭ ਤੋਂ ਪਹਿਲਾਂ ਯਾਦ ਕਰ ਲਓ,
ਪੱਕਾ ਊੜਾ-ਆੜਾ I
ਵਾਰੀ-ਵਾਰੀ ਪੜ੍ਹਕੇ ਵੇਖੋ, 
'ਕੱਲਾ-'ਕੱਲਾ ਪਹਾੜਾ I
ਏਹੇ ਸਾਰੀ ਗੱਲ ਮਿਹਨਤ ਦੀ, 
ਨਾ ਕੋਈ ਲਗਦਾ ਭਾੜਾ I 
ਕਿਤਾਬਾਂ ਵਿੱਚ ਲਿਖਿਆ, 
ਕਦੇ ਨਾ ਬੋਲੋ ਮਾੜਾ I

(9)
ਹੱਸਦੇ ਉੱਠੋ ਸੁਭਾ-ਸਵੇਰੇ, 
ਹੱਸਦੇ ਰੋਜ਼ ਨਹਾਓ I
ਹੱਸਣਾ ਹੀ ਤੰਦਰੁਸਤੀ ਹੁੰਦੀ, 
ਆਦਤ ਇਸਦੀ ਪਾਓ I
ਖੁਸ਼ੀ-ਖੁਸ਼ੀ ਵਿੱਚ ਕਰੋ ਪੜ੍ਹਾਈ, 
ਐਵੇਂ ਨਾ ਘਬਰਾਓ I
ਬੱਚਿਓ ਹੱਸ-ਹੱਸ ਕੇ,
ਆਪਣਾ ਖੂਨ ਵਧਾਓ I

(10)
ਬੱਸਾਂ,ਜੀਪਾਂ,ਕਾਰਾਂ,ਗੱਡੀਆਂ,
ਸਾਧਨ ਆਵਾਜਾਈ I
ਇੱਕ ਤੋਂ ਦੂਜੀ ਥਾਂ ਜਾਣ ਲਈ,
ਸਭ ਨੇ ਰੇਸ ਲਗਾਈ I
ਕੁਝ ਚਿਰਾਂ ਵਿੱਚ ਹੀ ਪਹੁੰਚੋ, 
ਜਿੱਥੋਂ ਦੀ ਟਿਕਟ ਕਟਾਈ I
ਇਹਨਾਂ ਚੀਜ਼ਾਂ ਨੇ,
ਸਭ ਨੂੰ ਮੌਜ ਬਣਾਈ I